Сарыал

Сэтинньи 19 күнүгэр Үөдэйбит нэһилиэгэр үөрүүлээх күн буолан ааста. Российскай Федерация композитордарын союһун чилиэнэ, СӨ ускуустубатын үтүөлээх диэйэтэлэ, Нам улууһун, Үөдэй, Никольскай нэһилиэктэрин Ытык киһитэ, композитор Василий Алексеевич Зырянов аатынан Үөдэйдээҕи народнай хор «народнай» аатын бигэргэтэр дьоро түһүлгэтэ үрдүк таһымҥа ааста. Республикатааҕы норуот айымньытын дьиэтин вокалга специалиһэ, СӨ култууратын туйгуна Анастасия Титовна председателлээх экспертнай комиссия кэлэн народнай хору сыаналаан, көрөн, истэн барда. Комиссияҕа кулууп үлэтин методикатын специалиһа, СӨ үөрэҕириитин туйгуна О.И. Жиркова, Республикатааҕы норуот айымньытын дьиэтин хотугу норуоттар культураларыгар специалиһа, СӨ култууратын туйгуна Ж.Н. Жиркова, «Ньургуһун» народнай хор, үҥкүү коллективын хормейстера, ССРС култууратын туйгуна, СӨ култууратын үтүөлээх үлэһитэ, Таастаах, Нам нэһилиэктэрин Ытык киһитэ Е.А. Кутукова, «Нам улууһа» муниципальнай тэриллии культураҕа уонна духовнай сайдыыга управлениетын салайааччыта, СӨ култууратын туйгуна Е.А. Заровняева кыттыыны ылан сыаналаатылар, сүбэ-ама биэрдилэр.

Народнай хор салайааччыта Мария Кельциева дьону-сэргэни түмэн, СӨ култууратын туйгуна Афанасий Татаринов народнай хору бэлэмнээн, баяҥҥа доҕуһуоллаан ырыа дьоро түһүлгэтэ үрдүк таһымҥа ааста. Кэнсиэри иилээн — саҕалаан ыыппыт Вера Даниловаҕа, ырыанан, үҥкүүнэн киэргэппит, кыттыыны ылбыт «Музы музыки» үҥкүү бөлөх нарын намчы кыргыттарыгар, «Чуораанчык» уһуйаан кыракый иитиллээччилэригэр, СӨ Үөрэҕириитин туйгуна, «Оскуолаҕа киириэн иннинээҕи саастаах оҕолору сайыннарыыга кылаатын иһин» знак хаһаайката, «Музыка барыбытыгар» проект СӨ бастыҥ салайааччыта, Е.Борисов аатынан Президент Гранын кыайыылааҕа Т.Н.Афанасьева салайааччылаах «Чуораанчык» уһуйаан коллективын «Ай-талаан» вокальнай ансаамбылыгар, З.П.Саввин аатынан Үөдэй орто оскуолатын 7 кылааһын «Дорҕоон» литературнай бөлөх уолаттарыгар «Сарыал» сынньалаҥ киин аатыттан махталбытын тиэрдэбит.

Ырыабыт курдук ыраас санаалаах, уостубат дьулуурдаах, инникигэ эрэллээх, түмсүүлээх, дьоллоох-соргулаах буолуоҕун!