Сарыал

Эдуара Сергеева сырдык кэриэһигэр «Үҥкүү кэрэ эйгэтигэр» тэрээһин ыытыллынна.

 Муус устар 11 күнугэр, өр сылларга А.Н.Окоемов аат. «Мичээр»  үҥкүү  норуодунай ансаамбылыгар, «Сарыал» СК директорынан таһаарыылаахтык үлэлээбит, «Путь к успеху»  улуустааҕы култуура үлэһиттэрин күрэҕин кыайыылааҕа, СӨ култуура үлэһиттэрин өйүүр сыаллаах «Лучший работник культуры»   бириэмийэ  кыайыылааҕа,  СР култууратын туйгуна Эдуара Сергеева туруоран хаалларбыт  үҥкүүлэринэн сырдык кэриэһигэр анаммыт «Үҥкүү кэрэ эйгэтигэр» марафон-концерт  истиҥ киэһээтэ буолла.

Бу күн кыттыыны ыллылар Эдуара  туруорбут үҥкүүлэринэн 

А.Н.Окоемов аат. «Мичээр» үҥкүү норуодунай ансаамбыла,

«Чэбдик»,“Чэмэлиинэ”, “Ымыйаана”, “Күбэйэ”,  “Лаглайбаана” үҥкүү бөлөхтөрө , Мэҥэ Хаҥаластан ”Сыдьаай” үҥкүү бөлөҕө.

Олох диэн дьикти! Олох-уустук суол! Көтөр кынаттаах  көтөргө анаммытын курдук, киһи олоҕу олорорго,  дьолго-соргуга ананан күн сирин көрөр. Кини төрөөбүт ийэ буоругар, бар дьонун өйүгэр-санаатыгар, сүрэҕэр дууһатыгар умнуллубат суолу хааллараары төрүүр, ууһуур.

Биһиги Эдуарабыт ыччакка, кэрэҕэ  анаабыт олоҕо үтүө өйдөбүл буолан хаалыахтын. Кини сыана угуйар сырдык  уотугар, минньигэс мичээрдээх, нарын хамсаныылаах  үҥкүүлүү сылдьара биһиэхэ кэрэ көстүү буолан үйэлэргэ умнуллубатын!