Сарыал

Сэтинньи 4 күнүгэр дойду Үрдүнэн Норуот сомоҕолоһуутун күнүн көрсө «Үөдэй нэһилиэгэ» МТ Аҕа баһылыга дуоһунаһыгар киирэр үөрүүлээх чааһа, ону тэҥэ өр сылларга нэһилиэк баһылыгынан үтүө суобастаахтык үлэлээбит С.В. Ядреевы бочуоттаах сынньалаҥҥа атаарар долгутуулаах күн буолан ааста. Үөрүүлээх күҥҥэ ыҥырыылаах ытык – мааны ыалдьыт буолан үөрүүбүтүн үллэстэ, эҕэрдэлэрин тиэрдэ кэллилэр «Нам улууһа» МТ аҕа баһылыга Юрий Иннокентьевич Слепцов, улуус мунньаҕын бэрэссэдээтэлэ Алексей Иванович Винокуров, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Нам улууһун уонна Үөдэй нэһилиэгин ытыктабыллаах киһитэ, улуус мунньаҕын депутата Александр Николаевич Ядреев. Нам улууһун нэһилиэктэрин Аҕа баһылыктара, общественнай түмсүүлэр бэрэссэдээтэллэрэ. Саҥа талыллыбыт Иван Васильевич Гаврильевка нэһилиэк баһылыга буолбутун туоһуулуур ытык бэлиэни үөрүүлээх быһыыга кэтэттэ Нам улууһун уонна Үөдэй нэһилиэгин ытыктабыллаах киһитэ, государственнай уонна муниципальнай сулууспа бэтэрээнэ, 2007-2022 сылларга Үөдэй нэһилиэгин баһылыгынан үлэлээбит, Семен Владимирович Ядреев. Нэһилиэк быыбардааччыларын үрдүк итэҕэллэрин ылан, нэһилиэги салайарга сүҥкэн улахан эппиэтинэһи сүгэн, саҥа саҕахтары арыйарга нэһилиэк социольнай – экономическай, духуобунай сайдыытыгар үтүө суобастаахтык үлэлииргэ бар дьонун иннигэр андаҕар тылын эттэ.