Сарыал

САҤА СЫЛЫ 2023 СЫЛЫ көрсө АХСЫННЬЫ 31 күнүгэр «Сарыал» сынньалаҥ киинигэр Үөдэйбит дьоно-сэргэтэ үөрэ-көтө муһуннулар. Бу киэһээ Үөдэйбит Аҕа баһылыга И.В.Гаврильев, тэрилтэлэр салайааччылара үүнэн эрэр Саҥа куруолук сылынан бар дьонноругар эҕэрдэлэрин, баҕа санааларын тиэртилэр.

Эдэр ыччат маскалаах үҥкүүлэрэ уонна быйылгы сыл бэлиэтэ куруолук кыттыылаах үҥкүүлэрэ дьон биһирэбилин ылла. Варвара Тимофеева, «Сарыал» уонна КСК кыргыттарын ылбаҕай ырыалара бу киэһэни киэргэттилэр. Түөлбэлэринэн ыытыллыбыт «Маски Шоу» күрэх олус көхтөөхтүк, интэриһинэйдик ааста.

Түөлбэлэр бары араас мааскалары оҥостон дьон дьүүлүгэр таһаардылар. Дьүүллүүр сүбэ быһаарыытынан үһүс миэстэни «Сардаҥа» түөлбэттэн Александра Алексеева, иккис миэстэни «Кэскил» түөлбэттэн Намыыйа Баишева уонна бастакы миэстэни «Тэтим» түөлбэттэн Людмила Ефимова ылла.

Дьэ уонна бырааһынньыктааҕы саамай кэтэһиилээх ыалдьыттарынан Тымныы Моруос Хаарчаанатынаан уонна быйылгы сылбыт бэлиэтэ Куруолук буоллулар. Саҥа сыл бэлиэтэ бар дьоҥҥо кэһиитин толору корзиналаах мандариннары түҥэтэн күндүлээтэ. Ити курдук үөрүү-көтүү аргыстаах, ырыа-үҥкүү доҕуһуоллаах Саҥа 2023 сылбытын уруйдуу көрүстүбүт

Ол курдук ТОХСУННЬУ 1 күнүгэр 2023 сылы көрсө ураты, хатыыламмат тэрээһин буолан ааста. Саҥа сыл элбэх умнуллубат кэрэ түгэннэри бэлэхтээтин — диэн туран «КҮӨХ УОТ» бырааһынньыга буолан ааста. Нэһилиэк талааннаах дьоно, бастыкытын сыанаҕа тахсар дьолу билэр түгэннэрэ үүммүтэ. Көрөөччү сүргэтин көтөҕөн, бииртэн-биир сонун нүөмэрдэр кэлбит дьону сөхтөрдүлэр.

Ол курдук «Испанскай» — үҥкүүннэн Лия Ральфовна Голоморева үҥкүүлээн кэлбит дьону сөхтөрдө, Дуэт «Киһиэхэ кып-кыра наада дии» ырыанан дьүөгэлиилэр Намыыйа Баишева, Надежда Нератова сыанаҕа бастыкытын тахсан долгуйуу түгэнин биллилэр.

Бу алыптаах киэһэҕэ, долгута дьиэрэйэр вальска «Хаар вальсыгар» — ырыанан Екатерина Сорокоумова вальс үҥкүүгэ дьону ыҥырда «Ымыйаана» — үҥкүү бөлөҕө «Шезгари» — урукку үҥкүүлэртэн быһа тардан олус сэргэх үҥкүүнү көрдөрдүлэр.

КСК, «Сарыал» үлэһиттэрэ «Мексиканскай» дьэрэкээн көстүүнэн үҥкүүлэрин бэлэх ууннулар. Ону таһынан Үөдэй эдэр ыччата араас көрүҥ үҥкүүлэринэн киэргэттилэр. Бу курдук Саҥа сылы көрсө ыытыллыбыт тэрээһини, көрөөччү интэриэһиргээн сырытта, ытыс сылаас тыаһын бэлэх уунна.

ТОХСУННЬУ 3 күнүгэр кырачаан оҕолорго бу күн «Сарыал» — сынньалаҥ киин үлэһиттэрэ уонна З. П. Саввин аатынан Үөдэйдээҕи орто оскуолатын «Саабын сыдьааннара» 2023 сыл бэлиэтэ «Куобах» — остуоруйа кыыл доҕотторун кытта араас геройдара, остуоруйа көрдөрөн, кырачаан оҕолорго бэлэх ууннулар,

Тымныы оҕонньор, Хаарчаана сиэнин кытта, кырачаан оҕолорго, бастыҥ маскарадтаах геройдарга, бэйэтин бэлэҕин туттарда. Кэрэчээн харыйа тула хоровод ырыата ньиргийдэ.
Бу күн киэһээтигэр үҥкүү-битии аргыстаах ыччат билэ дьоннорбут, оскуола улахан кылаас оҕолоругар уоттаах-күөстээх үҥкүүгэ, дуоһуйа үҥкүлээтилэр, оонньоотулар.

ТОХСУННЬУ 7 күнүгэр Ороһооспо күн Үөдэйбит киэҥ туонатыгар бэрт сэргэх түөлбэлэр икки ардыларыгар «Снежная Королева» күрэх буолан ааста. Күрэххэ 4 түөлбэттэн 4 Кэрэ Куо күөн көрүстүлэр. Күрэхпит бэйэни билиһиннэрииттэн саҕаланна.

Кыттааччыларбыт хоммут уостарын хоҥнорон, өрөөбүт уостарын өһүлэн бэйэлэрин бэрт сэргэхтик билиһиннэрдилэр. Иккис түһүмэххэ кыргыттар талан ылбыт иккилии боппуруостарыгар лоп- бааччы эппиэттээтилэр. Үһүс түһүмэх эмиэ олус интириэһинэйдик ааста.

Ол курдук бу түһүмэххэ кыргыттарбыт талааннарын арыйдылар. Бастакы нүөмэрдээх кэрэ куоластаах Варвара Тимофеева ылбаҕай ырыатынан дьон биһирэбилин ылла, иккис нүөмэрдээх талааннаах тарбахтаах Татьяна Ядреева тикпит сахалыы таҥастарын көрөөччү дьүүлүгэр таһаарда, үһүс нүөмэрдээх кэрэ мичээр аргыстаах Нарыйа Иванова Хотуна Анна Васильевналыын бииргэ ыллаан дьону үөртүлэр, төрдүс нүөмэрдээх сүрдээх активистка Намыыйа Баишева дьүөгэтинээн Надежда Нератовалыын дуэттааннар көрөөччүнү сэргэхситтилэр.

Дьэ уонна саамай күүтүүлээх кыраһыабай төрдүс түһүмэх «Снежная Королева» уобараһын көрдөрүү буолла. Көрөөччүлэр, дьүүллүүр сүбэ хас биирдии кыттааччы кыыһы ытыс дохсун тыаһынан көрүстүлэр. Кыргыттар бары да талбыт курдук кыраһыабайдара, кэрэлэрэ бу түһүмэххэ көһүннэ. Саамай долгутуулаах чааһа түмүк тахсыыта буолар. Екатерина Ядреева бэрэссэдээтэллээх дьүүллүүр сүбэ түмүгү таһаарбытынан «Королева Симпатия 2023» ааты сүктэ «Кэскил» түөлбэттэн Баишева Намыыйа.
» Королева Очарования 2023″ ааты сүктэ «Айылгы» түөлбэттэн Иванова Нарыйаана.
«Королева Грация 2023» ааты сүктэ «Тэтим» түөлбэттэн Варвара Тимофеева
«Королева Таланта 2023» ааты сүктэ «Сайдам» түөлбэттэн Татьяна Ядреева.
Дьэ уонна «Снежная Королева» үрдүк ааты ылла Татьяна Ядреева.
Күрэҕи ырыанан, үҥкүүнэн киэргэттилэр урукку үҥкүүлэртэн быһа тардан «Ымыйаана» — үҥкүү бөлөҕө «Шезгари»,
Хомус дьүрүскэн тыаһын бэлэхтээтэ Геннадий Игнатьев, чаҕылхай куоластаах Владимир Габышев, кэрэ ырыатынан эҕэрдэтин тиэртэ Екатерина Сорокоумова, Ансамбылынан эҕэрдэлэрин бэлэх ууннулар «Сарыал» сынньалаҥ киин үлэһиттэрэ.
Барҕа махталбытын тириэрдэбит күрэх сүрүн спонсордарыгар А.Н.Ядреевка, Э.В.Константиновка, Р.К. Петровка.
Бары кыттыбыт, көмө буолбут дьоммутугар махтал тылларын аныыбыт

ТОХСУННЬУ 13 күнүгэр. Эргэ Саҥа дьылы көрсө, эһиэхэ эрэ анаан, саҥа дьыллааҕы киэһэ атмосфератын хатылааһын буолан ааста.

Бу күн Саҥа Дьыл бастыҥтан бастыҥ нүөмэрдэрэ, хаһан да хатыламмат, кэрэ түгэннэрин бэлэх ууннулар. Биэчэри арыйдылар эдэр ыччат «Уоттаах үҥкүүтүнэн». Тэрээһини иилээн-саҕалаан ыыттылар, эрчимнээх эдэр ыччаттар Геннадий Игнатьев, Варвара Тимофеева. Уонна араас тэтимнээх үҥкүүлэр «Ымыйаана» бөлөҕө, эдэр ыччат үҥкүүһүттэрэ, КСК, «Сарыал» үлэһиттэрэ киэргэттилэр.

Саҥа дьыллааҕы тэрээһин бары ырыаһыттара дьиэрэтэн ыллаан-дуорайан дьону-сэргэни сэргэхситтилэр. Көрдөөх оонньууларынан көрөөччү биһирэбилин ыллылар.
Кыттыбыт бар дьоммутугар баҕарыа этибит бу Саҥа сылга кытаанах доруобуйаны, дьолу-соргуну уонна кыттааччыларбытыгар улахан барҕа махталбытын тиэрдэбит.