Сарыал

Ол курдук аптаах, алыптаах киэһэбит тэрилтэлэр «Магия Азии» күрэхтэринэн саҕаланна. Сээркээн Сэһэн Азия дойдуларын кэрэ көстүүлэрин сэһэргээн көрөөччүлэр интэриэстэрин татта. Тэрилтэлэр талан ылбыт дойдуларын норуоттарын үҥкүүлэринэн, ырыаларынан кэлбит дьону-сэргэни эҕэрдэлээтилэр.
Ол курдук Олохтоох дьаһалта (Корея), И.Н. Зырянов аат. КСК (Индия), «Чуораанчык» оҕо саада (Грузия), 5- МПЧ (Нучча), В.А. Зырянов аат. «Сарыал» СК (Монголия), З.П. Саввин аат. Үө.О.О. (Китай), уонна Почта, Е.И. Кондакова аат. Балыыһа, «Чороон» маҕаһыын (Турция).
Бары да олус көхтөөхтүк кыттан дьон сэҥээриитин ыллылар. Онтон түөлбэлэр быйылгы саҥа сыл бэлиэтин дракону олус тупсаҕайдык оҥорон дьүүллүүр сүбэни, көрөөччүлэри сөхтөрдүлэр. Дьэ ол кэннэ үөрүүлээх күҥҥэ нэһилиэк Аҕа баһылыга Иван Васильевич Гаврильев бар дьонугар саҥа дьыллааҕы эҕэрдэтин эттэ. Ону тэҥэ Тымныы Моруос оҕонньор Хаарчаанатынаан эҕэрдэлээн дьону-сэргэни үөртүлэр. Ытыс дохсун тыаһынан кэлбит дьоҥҥо кэрэ ырыаларын бэлэхтээтилэр Виссарион Бочкарев, Николай Шишигин, Радомир Лиханов.
Түмүккэ тэрилтэлэр икки ардыларынан күрэххэ 3 миэстэҕэ таҕыстылар олохтоох администрация коллектива, 2 миэстэни МПЧ-5 хорсун уолаттара ыланнар үөрүүлэрэ үрдээтэ уонна 1 миэстэни саамай көхтөөх «Чуораанчык» оҕо саад коллектива ылан кыайыы өрөгөйүн биллэ. Онтон түөлбэнэн дракон оҥоруутун күрэҕэр 4 м. «Тэтим»түөлбэ, 3 м. «Кэсил» түөлбэ, 2 м. «Сардаҥа» түөлбэ тигистилэр уонна саамай тупсаҕай оҥоһуулаах дракону көрдөрбүт «Сайдам» түөлбэттэн Марианна Татаринова 1 м ылыан ылла. Дьэ ити курдук бары кыайыылаахтар, кыттыбыт дьон сыаналаах бэлэхтэри, бириистэри тутан үөрэн-көтөн, сүргэлиин көтөҕүллэн саҥа 2024 сылы кыайыы өрөгөйдөөх, үөрүү аргыстаах көрүстүлэр.
Саҥа 2024 сылбыт бастакы үөрүүлээх күнүгэр Үөдэй нэһилиэгэр ырыа, үҥкүү киэһэтэ буолан ааста. Ол курдук «Иван Шоу» сэргэх программалаах кэлэн олохтоохторго сонун ырыалары бэлэхтээтилэр, көрдөөх оонньуулары оонньоттулар. Үҥкүү битии оройуттан тутулунна
Тохсунньу 4 күнүгэр, «Моруос үтүлүгэ» кырачаан оҕолорбутугар анаан утренник буолан ааста. Тэрээһин инсценировкаттан саҕаланна оҕолор олус үөрэн — көтөн хоһооннорун ааҕан, ыллаан, үҥкүүлээн Моруос оҕонньор уонна сиэн кыыһа Хаарчаана бэлэҕин, эҕэрдэтин туттулар. Ол кэннэ бары илии — илииттэн тутуһан Күөх харыйа тула хоробуоттаан, үҥкүүлээн үөрэн — көтөн тарҕастылар.