Сарыал

Алтынньы 4 күнүгэр «Үтүө санаа туоната» аҕам саастаахтар декадаларын чэрчитинэн ыытыллыбыт тэрээһин үрдүк таһымҥа ааста.

Сааһырбыт киһи күнэ ыраас, сырдык бырааһынньык. Бу күн тапталбытын, муҥура суох бэриниибитин итэҕэлбитин биллэрэр, этэр ураты күммүт буолар.

Тэрээһин алтынньы ыйдааҕы туомтан саҕаланна. Туому билиһиннэрдэ Айыы оҕото – Геннадий Игнатьев. Ону тэҥэ тоҕус добун хамсаныытын оҥордулар. Маны таһынан юбилярдарбытын үөрүүлээх быһыыга майгыга чиэстээтибит. Ол курдук көмүс күһүнү уруйдуу үөрүүлэрин үллэстэ кэллилэр: Неустроева Надежда Прокопьевна, Охлопкова Наталья Арсентьевна, Игнатьев Геннадий Иванович, Гаврильев Дмитрий Семенович, Обутов Виктор Павлович, Емельянова Мария Кузьминична, Соловьева Галина Михайловна. Кырдьар саас диэн киһи аайы тиксибэт, дьоллоохторго эрэ тиксэр дьылҕа. Эҕэрдэ тыллар этиллиннилэр, ырыа – тойук, үҥкүү – битии оройуттан тутулунна. Киһи оонньоон – көрүлээн бардаҕына дууһалыын сынньанар, ол курдук араас көрдөөх оонньуулары оонньоон күлэн – үөрэн үйэлэрин уһатан бардылар. Тон – Бас кыргыттара «Биэс бэһиэлэй кыргыттарым» ырыаны бэлэх ууннулар. Ону тэҥэ дьиэтээҕи сорудах бэриллибитэ, айылҕа матырыйаалыттан ким хайдах уратытык көрөрүнэн оҥоһук оҥорон аҕаллылар. Кыайыылааҕынан таҕыста Платонова Зоя Дмитриевна, отунан кэрэ бэйэлээх сэлээппэ уонна харысхал оҥорон сөхтөрдө. Сысолятина Анастасия Семеновна толору астаах корзина оҥорон аҕалбыт. Биэчэрбитин биир дойдулаахпыт Рожин Виктор Герасимович баян тыаһынан киэргэттэ.

Сарыал сынньалаҥ киин аатыттан аҕам саастаах көлүөнэбитигэр, күндү дьоммутугар истиҥ эҕэрдэбитин, үтүө тылбытын аныыбыт.