Сарыал

Эйэлээх олох иһин хорсуннук охсуспут биир дойдулаахтарбытыгар, үйэ-саас тухары  Сүгүрүйэн! Махтанан! Кэриэстээн!  Улуу Кыайыы 80 өрөгөйдөөх  сылын көрсөр үөрүүлээх параада үрдүк таһымҥа ааста.

Кыайыы болуоссатыгар миитин, ветераннарга «Үлэ киһитин уруйдаан!», «Өйдөбүнньүк чүмэчи» тэрээһиннэри нэһилиэк сүргэтэ көтөҕүллэн көрүстэ. Сарсыардаттан уулуссаларынан эҕэрдэ «Радиорубка» үлэлээтэ. Кыайыы болуоссатыгар Кыайыы ырыалара ньиргиччи холбоннулар. Бэлиэ күн үгэс быһыытынан Кыайыы 80 сылын көрсөр киэргэммит колонналар нэһилиэк устун Кыайыы болуоссатыгар диэри күргүөмүнэн хаамтылар, онтон сэрии ветераннарыгар анаммыт бастакы пааматынньыкка өйдөбүл, сүгүрүйүү бэлиэтэ венок ууруутуттан саҕаланна. Үөрүүлээх тэрээһиҥҥэ ыалдьыттаата Нам улууһун правовой отделын салайааччыта Галина Николаевна Охлопкова. Эҕэрдэ тыллар этилиннилэр, бырааһынньыктааҕы параады эҕэрдэ нүөмэрдэринэн киэргэттилэр махталлаах көлүөнэ — оскуола үөрэнээччилэрэ, эдэр ыччаттар, үһүс көлүөнэ оскуолата. Ону таһынан «Чуораанчык» оҕо саадын коллективын көмөтүнэн буорах сыттаах саллаат хааһытын санатан хонуу куукуната тэриллиннэ. Уонна түмүккэ Улуу Кыайыы Өрөгөйдөөх 80 сылынан «Кыайыы көтөллөөх өрөгөй Оһуохайын» Петр Егорович Федотов таһаарда.

Ытыктабыллаах биһиги эбээлэрбитигэр, эһээлэрбитигэр, аҕа саастаах көлүөнэ дьонугар, убаастабыллаах тыыл бэтэрээннэригэр, бар дьоммутугар үөрүүлээх, долгутуулаах, кэтэһиилээх бэлиэ күнүнэн эҕэрдэ остуол буолан ааста. Бу өрөгөйдөөх күҥҥэ мустан, остуол тула олорон ирэ-хоро сэлэһэн, уруккуну ахтыһан, ыллаан-туойан сэргэхсийэн бардылар. Күндү дьоммутугар тапталбыт, убаастабылбыт, махталбыт муҥура суох. Кырдьар диэҥҥэ кыһаллыбакка, ыарыы диэни ылыммакка, чиргэл чэгиэн доруобуйаланын, уу чуумпу олохтонун. Чугас дьоҥҥут тапталлара, истиҥ сыһыаннара санааҕытын кынаттаатын.

Маны таһынан киэһээ «Өйдөбүнньүк чүмэчи» сандаара уматылынна.

«Өйдөбүнньүк чүмэчи» хас биирдии киһи олоҕор ураты суолталаах. Онуоха кэриэстэбил чүмэчини сандаарда уматыы, кыайыыны сэрии толоонугар, тыылга уһансыбыт, олохторун толук уурбут ытык дьоммутугар муҥура суох махталлаахпытын, кинилэргэ сүгүрүйэрбитин, сырдык ааттарын үйэлэргэ ааттата турар соруктаахпытын, ытык иэстээхпитин көрдөрөр дьоһун бэлиэ түгэнэ. Бу бүгүҥҥү дьоллоох, эйэлээх олохпутун аҕалсыбыт, уһансыбыт биир дойдулаахтарбыт — буойун убайдарбыт сырдык ааттарын ахтан-санаан, кэриэстээн ааһарбыт хайаан да наадалаах! Кинилэри умнуохтара суоҕа Улуу Кыайыы дьоллоох сааһыгар төрөөбүт көлүөнэ дьоно, биһиги, бүгүн уонна сарсын төрүүр оҕолорбут, ыччаттарбыт! Тоҕо диэтэххэ кинилэр тустарынан көлүөнэттэн көлүөнэҕэ ахтылла, ааттана туруохтара. Бары биир санаанан кэлэн кыттыыны ылбыккытыгар махтанабыт. Ким да умнуллубат, туох да умнуллубат!

Ыам ыйын 9 күнүгэр Улуус киинин парадыгар нэһилиэкпитинэн кыттыыны ыллыбыт. Ыраас халлааннаах, күндэлэс күннээх өрө күүрүүлээх Кыайыы күнэ элбэх умнуллубат чаҕылхай түгэннэри хаалларда. Ону бэлиэтиир дьон астыммыт санаата үгүс. Василий Зырянов аатынан норуодунай хор «Ким да умнуллубат, туох да умнуллубат!» ырыаны ньиргиччи ыллаатылар. Кыайыы 80 сылын бэлиэтиир ураты парад тэрээһинэ олус үчүгэй, дьон сүргэтэ көтөҕүлүннэ.

Бу ытык күҥҥэ биһигинниин бииргэ буолбуккутугар бары махталы кытта «Сарыал»сынньалаҥ киин коллектива.