Сарыал

Күн уота чаҕылыччы көрөн, сир-дойду биллэ көҕөрдө, мутукчабыт тылынна, дыргыл сыта сүрэҕи-быары ортотунан киирэр.

Бүгүн Ыам ыйын 22 күнүгэр Ньукуолун уонна сайылык күнүгэр Сиэр-Биэ, Арыылаах, Мохсоҕоллоох уонна Тоҥ-Бас сайылыктарынан эҕэрдэлээн кэллибит.

Бу бырааһынньык биһиги норуоппут үйэлэри уҥуордаан илдьэ кэлбит үгэстэрэ. Саха дьонугар-сэргэтигэр сайылыкка көһүү самаан сайын кэлиитин, күөх от дыргыл сытын, түптэ унаар буруотун, бастакы куйаас күннэри кытта ситимнээх. Биһиги өбүгэлэрбит күөххэ үктэммиттэриттэн сүргэлэрэ көтөҕүллэн сүөһүлэрин мэччирэҥҥэ үүрэллэрэ, сайылыктарын оҥостоллоро. Саха норуотугар былыр-былыргыттан Ньукуолун күнэ олус ытыктанар, улахан суолталаах, күүтүүлээх бырааһынньык. Бу күн уһун тымныы кыһыны туораан, этэҥҥэ күөххэ үктэнии үөрүүтэ-өрөгөйө буолар. Биһиги өбүгэлэрбит бу күн айылҕаҕа тахсан сири-дойдуну аһатан, айыыһыттарыгар сүгүрүйэн туран, салама ыйаан баҕа санааларын этэллэрэ, инники олохторун түстүүллэрэ.

Ол курдук бүгүҥҥү күҥҥэ ыам ыйын туомун оҥордулар дьөһүөлдьүт Мария Кельциева, алгыс сиэрин туомун Геннадий Игнатьев – Айыы оҕото. Ону тэҥэ ситиигэ сайылык олохтоохторо бэйэлэрин баҕа санааларын этэн туран салама баайдылар. Үтүө сайыҥҥы күнүнэн эҕэрдэ тылын уонна эҕэрдэ сурук туттарда “Үөдэй нэһилиэгэ” тыа сирин түөлбэтин дьаһалтатын баһылыгын солбуйааччыта Николай Михайлович Обутов. Уонна олохтоох библиотека сайылыктарга кинигэ тиэрдии өҥөтүн оҥордо уонна тургутук «Сайыҥҥы таайбараҥ» таайтарда.