Сарыал

Үгэс буолбут сылын аайы ыытыллар нэһилиэктэр икки ардыларыгар ыытыллар уус – уран самодеятельность фестивалыгар Үөдэй нэһилиэгин дьоно – сэргэтэ көхтөөх кыттыыны ылла. Быйылгы фестиваль Россияҕа уһуйааччы уонна аҕа сүбэһит сылыгар, Саха Өрөспүүбүлүкэтигэр үлэ сылыгар, Нам улууһугар сомоҕолоһуу уонна биир санааланыы сылыгар ананна.

             Фестиваль хас да көрүҥҥэ араарыллан ыытыллынна. Ол курдук үҥкүү, ырыа фольклор, пьеса, көрдөөх сценка, олоҥхо толоруута ирдэбил быһыытынан туруоруннулар. Бастакы көрүҥҥэ улахан дьоҥҥо Эдуара Сергеева туруорбут «Саха оһуорунуу сайдыахха, сомоҕолоһуохха!», о5олорго көҥүл тиэмэҕэ “Эбээм күөрчэҕэ” сахалыы үҥкүүлэр дьүүллүүр сүбэ уонна көрөөччү биһирэбилин ыллылар. Түмүккэ “Эбээм күөрчэҕэ” үҥкүү 3 степеннээх лауреат, 24 киһи кыттыылаах сахалыы үҥкүү “Лучшая постановка народного танца”, “Диплом победителя” ааттары ыларга ситиһиилэннэ.

Бу күн ырыа көрүҥүн эмиэ көрдөрдүлэр. Ол курдук Мария Кельциева салайааччылаах эр дьон ансаамбыла Василий Зырянов музыкатыгар “Кымыстаах чороону көтөхтүм” ырыанан 3 степеннээх лауреат, биирдиилээн толорооччуларга Афанасий Афанасьев «Туругура тур Сахам сирэ» ырыаны толорон 1 степеннээх дипломан ылары ситиһэннэр, дьон бол5омтотун тарданнар үөрүүбүт муҥура суох.

Үһүс көрүҥ пьеса, көрдөөх сценка туруоруута буолла. Пьесаҕа Марина Ядреева салайыытынан Суорун Омоллоон «Сайсары» драматыттан быһа тардан көрдөрдүбүт. Оруолларга оонньоотулар: Сайсары  — Татьяна Иванова, Мүдьү – Эрсан Ядреев (2 кылаас), Моһуок – Айхаан Сысолятин (4 кылаас), Полянскай – Константин Ядреев, Саратаал – Геннадий Игнатьев, Быыпсай кулуба – Иннокентий Иванов, хамначчыт – Афанасий Винокуров, олус итэҕэтиилээхтик оонньооннор «Лучшая постановка якутской классики» ааты,  дьүүллүүр сүбэ хайҕабылын ыллылар. Көрдөөх сценкаҕа «Семейнэй психолог» туруоран дьон бол5омтотун тартылар. Оруолларга психолог – Намыыйа Баишева, Клавдия – Татьяна Иванова, Дархан – Геннадий Игнатьев оонньоотулар. Түмүккэ 1 степеннээх дипломан ылан үөрүүбүт үрдээтэ.

Төрдүс көрүҥ фольклор буолар. Геннадий Игнатьев салайыытынан «Өбүгэ ситимэ» фольклорнай композиция туруоран ситиһиилээхтик кытынна. Тойуксуттар —  Любовь Яковлева, Валентина Матвеева, чабырҕахсыттар – Варвара Гоголева, Мария Поротова, Намыыйа Баишева, хомусчуттар Алена Ядреева, Сандаара Черноградская, Мария Михайлова, Надежда Ядреева, норуот ырыата  — “Татыйык” фольклорнай бөлөх кыргыттара Валентина Ядреева, Анна Давыдова, Варвара Гоголева, Надежда Нератова, Намыыйа Баишева. Эр дьон бөлөҕөр Афанасий Афанасьев, Петр Новгородов, Иоганн Михайлов, Геннадий Игнатьев, Юлиан Иванов кыттыыны ыллылар. Оһуохайы таһаарда нэһилиэк убаастанар киһитэ, түөлбэ оһуохайын тарҕатааччы оһуохайдьыт Петр Егорович Федотов. Биирдиилээн олоҥхо толоруутугар Ульяна Корякина П.П. Ядрихинскай – Бэдьээлэ «Дьырыбына Дьырылыатта – Кыыс бухатыыр» олонхоттон быһа тардан олонхолоото. Түмүккэ фольклорнай композиция 3 степеннээх лауреат, «Дэгэлдьитэр оһуохай» анал аат, «Кылыһах ырыалаах, дорҕоон тойуктаах олонхоһут» анал аат хаһаайыттарынан буоллулар.

Уопсай түмүгүнэн «Үөдэй нэһилиэгэ» муниципальнай тэриллии бастакы группа нэһилиэктэригэр 3 степеннээх лауреат ааты ылла. Бары кыттыбыт нэһилиэкпит олохтоохторугар, күүс – көмө буолбут бар дьоммутугар, олохтоох дьаһалтабытыгар улахан махталбытын тиэрдэбит. Төрөөбүт Үөдэйбит туһугар өрүү маннык түмсүүлээх, биир сомоҕо буолан кыттаргытыттан киэн туттабыт!