Сарыал

Ахсынньы 1 күнүгэр «Кыһын саҕаланар Саха сириттэн» фестиваль чэрчитинэн Үөдэй нэһилиэгэр бырааттыы Яковлевтар мини- паркаларыгар нэһилиэк харыйатын уотун сандаардар кэрэ түгэн буолан ааста. Кыраачааннар төрөппүттэринээн симэммит харыйа тула тоҕуоруһа муһуннулар. Нэһилиэк баһылыга Иван Васильевич Гаврильев кэлбит дьоҥҥо бу кэрэ алыптаах күнүнэн эҕэрдэтин эттэ. Ол кэннэ Тымныы Моруос оҕонньор сиэн кыыһынаан Хаарчаналыын ыраахтан айаннаан кэлэн, ааһан эрэр сыл бэлиэтэ дракону кытта кырачаан оҕолору, улахан дьону кэлэр сылга кэрэни, үтүөнү баҕаран туран эҕэрдэлээтилэр уонна күөх харыйа уотун күлүмүрдэтэ оонньоттулар. Оҕо аймах үөрэн-көтөн күлүмүрдэс күөх харыйа тула хороводтаан тэйдилэр.

Ол кэннэ «Сарыал» сынньалаҥ киинигэр Гольдеров SHOW магия алыптаах түгэнэ буолан ааста🪄❄️
Залга мустубут оҕо-аймах фокус араас албастарын көрөн сөхтө-махтайда, дьиктиргээтэ. Салгынҥа маҥан холууптар өрө-көтөн тахсаннар өссө кэрэ умнуллубат түгэни үөскэттилэр, араас өҥнөөх былааттартан кыраһыабай попугай баар буола түһэн кырачаан көрөөччүлэри үөртэ.
Үөдэй дьонугар-сэргэтигэр, кырачаан оҕолоругар кэрэ умнуллубат түгэни бэлэхтээбит Алексей Гольдеровка махтал тылларын этэбит.
🪄❄️⛄🎄🪄❄️⛄🎄🪄❄️⛄