Сарыал

Балаҕан ыйын 23 күнүгэр Айыыһыттаах Үөдэй нэһилиэгэр «Культурный код Намского улуса» бырайыак чэрчитинэн   В. П. Артамонов аат. Хамаҕаттатааҕы саха-французскай лицейын «Силис» үөрэтэр — чинчийэр экспедиция оҕолоро  учууталларын кытта  нэһилиэк «Ийэҕэ албан аат» түмэлигэр, олохтоох библиотека дьиэтигэр, культура уонна спорт дьиэтигэр сырыттылар, ону тэҥэ биирдиилээн  дьону кытта көрүстүлэр.

Ол курдук, Үөдэй баай историятын З.П. Саввин аат. Үөдэй орто оскуолатын «Ийэҕэ албан аат» түмэлигэр Алексей Дмитриевич Яковлев сиһилии кэпсээтэ, фольклор хайысхатын билиһиннэрдилэр Петр Егорович Федотов, Евдокия Гаврильевна Посельская. Нэһилиэк олохтооҕо, ытык кырдьаҕас Елизавета Николаевна Владимироваҕа сылдьан олус истиҥ кэпсэтии буолла.

 Суруйааччылары олохтоох библиотека сэбиэдиссэйэ Ксения Степановна Сидорова сиһилии кэпсээтэ.

Спорт хайысхатын Анатолий Иванович Барашков сырдатта. Ону тэҥэ культура уонна спорт дьиэтигэр Василий Алексеевич Зырянов туһунан сиһилии народнай хор салайааччыта Мария Святославовна Кельциева уонна директор Геннадий Геннадиевич Игнатьев кэпсээтилэр. Бу курдук эпспедиция кыттыылаахтара нэһилиэк историятын, үлэтин – хамнаһын туһунан баай матырыйааллаах айан суолун туттулар.